Елімізде газбен жүретін көлік иелері 1 қаңтардан бастап арнайы белгі қоюға міндеттелмек. Сауда және интеграция министрлігі талап орындалмаса, айыппұл қарастырылатынын мәлімдеді, деп хабарлайды kaskelen.kz ведомствоның Telegram-дағы ресми арнасына сілтеме жасап.
Ведомство мәліметіне сәйкес, өзгеріс бойынша газ баллонды жабдығы бар автокөліктерге арнайы белгі міндетті түрде жабыстырылуы қажет. Ол қара түсті жиегі бар және “GAS” леп белгісі жазбасы бар сары түсті теңбүйірлі үшбұрыш болып келеді. Бұл белгі жабық паркингтерге кірген кезде көлікті оңай тану үшін қажет.
Министрлік бүгінгі таңда 380 000-нан астам автокөлік газ баллонмен жабдықталғанын мәлімдеді. Бұған қоса ведомство өкілдері көлікке арнайы белгі жапсырылмаса айыппұл қарастырылғанын да еске салды.
“Белгі газ баллонмен жабдықталған автокөліктер үшін міндетті болғандықтан, ӘҚБтК 620-бабының 3 АЕК мөлшерінде айыппұл қарастырылған”, – дейді ведомство өкілдері.
