Ұлттық музейдің экс-басшысы Арыстанбек Мұхамедиұлы өзімен бірге айыпталып жатқан төрт азаматқа қатысты пікір білдірді, деп хабарлайды kaskelen.kz тілшісі КТК арнасына сілтеме жасап.
Қазір “Алтын адам көрмесі” мен “Дипломат” қонақ үйіне қатысты істер біріктіріліп, жаңаша айыптау актісімен қаралуда.
Экс-министрден бөлек Абай Сатыбалдин, Леонид Кочетов, Алмас Нұразхан, Азамат Көшенов пен Айым Сәдуақасова сынды азаматтар айыпталуда. Олар бұған дейін “Алтын адамның” әлем мұражайларындағы көрмесі бойынша 7 жылға сотталған-ды.
Үкімі шығып қойған істің қазір “Дипломат” қонақ үйіне қатысты іспен неге біріктірілгені белгісіз. Айыпталушылар істің мән-жайын біліп-тануға уақыт аз деп шағымдануда. Сонымен қатар бүгін осы сот отырысын өткізуге тиіс судьяның қандай себеппен ауысқаны белгісіз.
“Қазір сот болып жатыр. Отырған жігіттердің ешқайсының кінәсі жоқ. Ешқандай қылмыс, ешқандай ізі де жоқ. Былайша айтқанда, ешқандай фактісі де жоқ. Бәріне “Мұхамедиұлына сыйлық апарып бердіңдер” деп айтыңдар деген. Барлығы “ондай болған жоқ” деп. Оларда намыс бар. “Айтпасаңдар, отырғызамыз” деді”, – дейді айыпталушы Арыстанбек Мұхамедиұлы.
Еске сала кетейік, бір жылдан аса уақыт тергелген Арыстанбек Мұхамедиұлына сот үкімімен 8 жылға бас бостандығынан айырылған еді. Артынша, өткен айдың аяғында оған “Дипломат” қонақ үйін рейдерлік жолмен тартып алды деген қосымша айып тағылды. Куәгерлер экс-шенеуніктің қылмысы туралы сотта түсініктеме бергенімен, Мұхамедиұлының өзі “жала жауып отыр” деген сөзінен танар емес.
