Алматыда қаңтардың 23-нен 24-не қараған түні 3 мәрте жер сілкінісі орын алды. Алматылықтар жер дүмпуінен кейін жаппай көшеге шықты. Төтенше жағдай департаменті жедел жиналыс өткізді, деп хабарлайды kaskelen.kz. Видеоны мына сілтеме арқылы көре аласыз.
“Сейсмикалық станциялар желісі “Сейсмологиялық байқау және зерттеулер ұлттық ғылыми орталығы” ЖШС Қазақстан Республикасы Төтенше жағдайлар министрлігі 2024 жылдың 23 қаңтарында Алматы уақыты бойынша сағат 00:09:02-де жер сілкінісі тіркелді.
Жер сілкінісінің ошағы Алматыдан оңтүстік-шығысқа қарай 264 шақырым жерде Қазақстан мен Қырғызстан шекарасында орналасқан”, – деп мәлім етті төтенше жағдайлар департаментінің баспасөз қызметі.
Кейін Алматы ТЖД бастығы Нұрлан Атығаев қалада тағы да жер сілкінісі тіркелгенін хабарлады. Оның сөзінше, зілзала магнитудасы 2-3 балл болған.
“Құрметті Алматы тұрғындары! Сағат 00:42-де “Сейсмикалық станциялар желісі “Сейсмологиялық байқау және зерттеулер ұлттық ғылыми орталығы” ЖШС қайталанған жер сілкінісін тіркеді. Магнитудасы – 2-3. Сіздерден сабыр сақтауды, қауіпсіз орындарда болуды, көшеде, ғимараттардан алыс жерлерде болуды сұраймыз. Қазіргі сәтте “112” дағдарыс орталығына Алматы қаласы бойынша ғимараттардың қирауы туралы ақпарат келіп түскен жоқ. Зардап шеккендер мен қайтыс болғандар жоқ”, – деді Атығаев.
Ведомство ақпаратына сәйкес, үшінші мәрте жерасты дүмпулері 05:19-да тіркелген.
Жер сілкінісінің ошағы Алматыдан оңтүстік-шығысқа қарай 278 километр жерде Қырғызстан мен Қытай шекарасында орналасқан.
МSK-64 шкаласы бойынша, Алматыда жер сілкінісі 2-3 балл секілді сезілген.
“Алматы облысының Төтенше жағдайлар департаменті жергілікті атқарушы органдарды, полиция бөлімін, “Қазселқорғау”, прокуратура және басқа да ұйымдарды хабардар етті, сеніп тапсырылған аумақтардағы жағдай нақтыланып жатыр, қираулар мен зардап шеккендер туралы ақпарат келіп түскен жоқ”, – делінген хабарламада
