2024 жылы әлеуметтік салада 95 сыбайлас жемқорлық қылмысы тіркеліп, 58 адам әшкереленіп, 34 адам сотталды, деп хабарлайды kaskelen.kz тілшісі Сыбайлас жемқорлыққа қарсы Іс-қимыл агенттігіне сілтеме жасап.
Мәселен, Маңғыстау облысы бойынша Сыбайлас жемқорлыққа қарсы қызмет департаменті “Жаңаөзен Қалалық № 2 Емханасы” ШЖҚ МКК директоры мен бас есепшісіне қатысты сотқа дейінгі тергеуді аяқтады.
Олар мемлекеттік сатып алу шарты бойынша медициналық мақсаттағы бұйымдарды жеткізбестен жеке компанияның шотына 10,5 миллион теңге көлемінде қаражат аудару арқылы қаражатты жымқырды деген күдікке ілінді. Соттың санкциясымен кәсіпорын директоры қамауға алынды. Қылмыстық іс жүргізу кодексінің 201-бабына сәйкес басқа мәліметтер жария етілмейді.
Ағымдағы жылдың 26 тамызында Атырау қалалық соты Атырау қалалық № 4 емханасының директоры Е. Сабировқа, шаруа қожалығының басшысы А. Әлжановаға, бас есепші М. Дүйсенғалиеваға және кәсіпкер А. Ералиеваға үкім шығарды.
Алдын алу шаралары аясында сот процесі ашық режимде өтті. Бұл процеске облыстық Денсаулық сақтау басқармасының және оған қарасты 28 ұйымның қызметкерлері онлайн режимінде қосылды. Айыпталушылар кәсіпкерге 231,8 млн. теңге сомасында ақша аудару арқылы жымқырғаны үшін, іс жүзінде заңнама талаптарын бұза отырып жасалған шарттар бойынша қызмет көрсетпегені үшін кінәлі деп танылды.
Сот үкімімен олар 5 жылдан 7 жылға дейін бас бостандығынан айырылды. Сондай-ақ емхана меңгерушісі Сабиров мемлекеттік қызметте және квазимемлекеттік сектор субъектілерінде қызмет атқару құқығынан өмір бойына айырылды. Әлжанова, Дүйсенғалиева және Ералиева 7 жыл мерзімге мемлекеттік ұйымдарда материалдық және жауапты қызметтер атқару құқығынан айырылды.
Сот үкімі заңды күшіне енген жоқ. Конституцияның 77-бабы 3-тармағының 1-тармақшасына және Қылмыстық Іс жүргізу кодексінің 19-бабының 1-бөлігіне сәйкес, әрбір адам қылмыстық құқық бұзушылық жасағаны үшін кінәсі заңды күшіне енген сот үкімімен анықталғанға дейін кінәсіз деп танылады.
