Энергетика министрлігі электр қуатының дайындығын қолдау жөніндегі қызметке шекті тарифтерге өзгерістер енгізілетін бұйрық дайындады, деп хабарлайды kaskelen.kz.
Мәселен, электр қуатының дайындығын қолдау жөніндегі қызметке тариф мегаватт үшін 590 мың теңгеден 2024 жылы 1065 мың теңгеге дейін артады, 2025 жылы ол 1215 мың теңгені құрайды.
“2016-2022 жылдар аралығындағы кезеңде инфляция коэффициентін ескере отырып, қуаттылыққа шекті тарифтің деңгейі 2024 жылы айына 1065 мың теңге/МВт құрауы тиіс, бұл саланың инвестициялық тартымдылығын қамтамасыз етуге және авариялық жөндеудің жиілеп кеткен жағдайларын ескере отырып, Қазақстанның электр станцияларын күрделі жөндеуге қосымша инвестициялар тартуға мүмкіндік береді”, – делінген негіздемеде.
Құжат 22 қыркүйекке дейін ашық талқылау үшін Ашық НҚА сайтында орналастырылған.
2023 жылғы 5 қыркүйекте ҚР Энергетика министрі Болат Ақшолақов Қазақстанда электр энергиясына тарифтер өзгеретінін айтты. Бұл жыл сайын өсіп келе жатқан негізгі генерациялайтын базалық станциялардың тозуына байланысты. Қазір электр энергиясын өндірудің негізгі базалық генераторларын ауқымды жаңғырту және ауыстыру мәселесі тұр, оған қомақты қаражат қажет.
