1 тамыздағы жағдай бойынша Қазақстан халқының саны 20 182 003 адамға жетті. Ұлттық статистика бюросының мәліметі бойынша, елде әйелдер көп екені белгілі болды, деп хабарлайды kaskelen.kz тілшісі.
Ұлттық статистика бюросының сайтында ағымдағы жылдың 1 тамызындағы мәліметтер келтірілген. Оның айтуынша, Осы кезеңде Қазақстан халқының саны 20 182 003 адамға жетті.
Статистикаға сүйенсек, қала тұрғындарының саны 12 656 167 адамды құраса, ауыл тұрғындарының саны 7 525 836 адамды құрады. Сонымен қатар, Қазақстанда әйелдер саны 10 322 836, ал ерлер саны 9 859 167 екені белгілі болды.
Естеріңізге сала кетейік, бұған дейін 1 шілдедегі жағдай бойынша елімізде 20 159 707 адам тұрса, 1 қаңтардан бастап ел халқының саны 125 865 адамға артқан. Бір ай бұрын табиғи өсім 118 576 адамға жеткен еді.
2023 жылдың 16 қарашасында Қазақстан халқының саны 20 миллион адамға жеткені белгілі болды. Алғашқы жаңалықты мемлекет басшысы Қасым-Жомарт Тоқаев жеткізді.
