Бүгін Астанада Сенат жанындағы мәслихаттармен өзара іс-қимыл жөніндегі кеңестің кеңейтілген отырысы өтіп жатыр, деп хабарлайды kaskelen.kz порталы.
– Бүгін біз Мәслихаттармен өзара іс-қимыл жөніндегі кеңестің кеңейтілген отырысына жиналып отырмыз. Сенат жанындағы бұл консультативтік-кеңесші органның құрылғанына биыл он жеті жыл толып отыр. Осы уақыттың ішінде аталған алаң Парламент пен мәслихаттардың бірлескен жұмысының маңызды әрі тиімді тетігіне айналды. Осы орайда Кеңес жұмысы Қасым-Жомарт Кемелұлы Тоқаевтың бастамасымен қолға алынғанын атап өткен жөн. Жалпы, бүгінгі іс-шара мәслихаттардың мемлекеттік және жергілікті өзін өзі басқару жүйесіндегі рөлін талқылауға арналып отыр. Соның аясында мәслихаттардың жаңа кезеңдегі басымдықтарына жан-жақты әрі тереңірек тоқталамыз. Осыған байланысты жиынға Парламент пен мәслихаттардың депутаттары, Үкімет мүшелері, орталық және жергілікті атқару органдарының өкілдері қатысып отыр, – деді Сенат төрағасы Мәулен Әшімбаев.
Палата спикері еліміздегі мәслихаттардың рөлі жайында пікір айтты. 2022 жылғы конституциялық реформалардың аясында мәслихаттардың дербестігін нығайту арналған жүйелі шаралар қабылданды. Соның нәтижесінде олардың институционалдық және саяси құзыреті кеңейді. Сонымен қатар, мәслихат төрағасы деген лауазым енгізілді, облыс әкімдерін мәслихаттардың қатысуымен тағайындау тәртібі өзгерді. Сайлау жүйесі де реформаланды. Қазіргі таңда мәслихаттар жергілікті бюджетті бекітеді және оның орындалуын бақылайды.
Жергілікті атқарушы органдардың қызметіне мониторинг жүргізеді. Сондай-ақ, мәслихаттар еліміздің Парламент Сенатын жасақтайтынын айрықша атап өткен жөн.
– Жалпы, мәслихаттар 30 жылдан астам тарихы бар іргелі институт екені белгілі. Осы жылдар ішінде бұл орган формальды құрылымнан билік жүйесінің жергілікті жердегі толыққанды субъектісіне айналды. Қазіргі таңда елімізде 3300-ден астам мәслихат депутаты бар. Олардың бәрі сайлаушылардың мүддесін қорғай отырып, мемлекет пен халық арасындағы алтын көпірге айналды деп айтуға толық негіз бар. Мемлекет басшысы қолға алған соңғы саяси реформалардың арқасында осы жылдарда мәслихаттардың рөлі айтарлықтай нығайды. Бұл өзгерістер «Күшті Президент – Ықпалды Парламент – Есеп беретін Үкімет» атты мемлекеттік құрылыстың жаңа формуласына сәйкес жүзеге асырылды. Президентіміз Қасым-Жомарт Кемелұлы Тоқаев мызғымайтын осы үш тағанның тағы бір белгісі – жауапты жергілікті басқару екенін талай мәрте айтқан болатын. Сондықтан аталған қағидат аясында мәслихаттарға маңызды міндет жүктелетіні сөзсіз, – деді М. Әшімбаев.
Еске сала кетейік, бүгін Сенат жанындағы мәслихаттармен өзара іс-қимыл жөніндегі кеңестің отырысында Премьер-Министрдің орынбасары Ермек Көшербаев бірнеше төлем түрі ауыл бюджетінің пайдасына аударылатынын айтты.
