Су ресурстары және ирригация министрлігінің орынбасары Нұрлан Алдамжаров орталық коммуникациялар қызметінде өткен баспасөз мәслихатында су тасқыны Қазақстанның климатында жыл сайын қайталана беретінін айтты, деп хабарлайды kaskelen.kz порталы.
– Қазақстанда тасқын болмай, суару маусымында су жеткілікті болу үшін неше қойма салу керек. Ол қоймалар қашан пайда болады, – деп сұрады журналист.
Вице-министрдің сөзінше, бұл тұрғыда министрліктің жоспары айқын.
– Бізде тасқын кезеңі жыл сайын қайталанып отырады. Өйткені бұл өзендердің гидрологиялық цикліне байланысты және жалпы климат солай қалыптасқан. Сондықтан жыл сайын тасқын жағдайлары болып жатады. Әрине, тасқынға ерте бастан дайындаламыз.
Бұл жерде тасқынның суын жинақтау да маңызды. Қазір кейбір өңірлерде су қоймалары «жинақтау» режимінде жұмыс істеп тұр. Ал тасқын қаупі бар учаскелерде су деңгейін қолдан реттеп отырмыз.
Қазір елімізде 405-ке жуық су қоймасы жұмыс істеп тұр. 2030 жылға дейін тағы 42 жаңа су қоймасын салуды жоспарлап отырмыз. Олар бірінші кезекте тасқын суды жинақтап, тиімді жаратуға бағытталады. Әрине, қоймалар өзен арналарын тиімді реттеу арқылы тасқын салдарын болдырмауға мүмкіндік береді, – деді ол.
Вице-министрдің сөзінше, қазір халық әсіресе шағын өзендерден көп зардап шегіп отыр.
– Қазір елдегі су қоймаларының саны жеткіліксіз деп айтуға болады. Қазір жұмыс істеп тұрған 405 су қоймасы шамамен 80 млрд текше метр су жинақтай алады. Қазіргі жағдайда олардың сыйымдылығы жеткілікті. Ал мен айтып отырған 42 қойма қысқа мерзімді тасқын судың негізгі бөлігі келетін шағын өзендердің бойына салынады. Осы тұрғыдан алғанда жаңа су қоймаларына қажеттілік бар, – деді Нұрлан Алдамжаров.
