2024 жылы АХАТ органдары елде 123,6 мың неке тіркеді, бұл алдыңғы жылмен салыстырғанда 2,2% артық, деп хабарлайды kaskelen.kz тілшісі.
— Некелесудің жалпы коэффициенті 6,13 (1000 адамға). Некелескендердің көпшілігі Астана қаласында, 1000 адамға шаққанда 7,34 неке коэффициенті, сондай-ақ Алматы (6,98) және Ұлытау облыстарында (6,70) байқалды. Некеге тұрудың ең төменгі деңгейі Батыс Қазақстан облысында — 1000 адамға шаққанда 5,58 неке, — делінген Ұлттық статистика бюросының хабарламасында.
Отбасын құрғандардың ішін ерледердің 78% және әйелдердің 79,1% некеге алғаш рет тұрған, ажырасқаннан кейін қайта үйленген ерлердің үлесі — 20,8%, тұрмысқа шыққан әйелдерде –19,4%.
Қалалық жерде 82,1 мың неке (66,4%), ауылдық жерде 41,5 мың неке (33,6%) тіркелген.
Алғаш неке құрған ерлердің орташа жасы 27,9 жас болса, әйелдер үшін — 25,2 жас.
2024 жылы неке жаз айларында ең көп тіркелген: маусым — 11 675, шілде — 13 739, тамыз — 12 936.
Барлық тіркелген некенің 81,8% моноэтникалық болса, қалған 18,2% — этносаралық.
Ажырасуға келетін болсақ, 2024 жылы олардың саны 40,5 мың болды.
Қалалық жерде 30,1 мың ажырасу (74,4%), ауылдық жерлерде — 10,4 мың ажырасу (25,6%) тіркелген. Ажырасудың жалпы коэффициенті 2,01 (1000 адамға).
— Ажырасудың ең жоғары деңгейі ШҚО-да, 1000 адамға шаққанда 3,12 коэффициентімен, сондай-ақ Қарағанды (3,11) және Павлодар (3,09) облыстарында байқалды. ажырасудың ең төменгі деңгейі Түркістан облысында — 1000 адамға шаққанда 0,90, — делінген хабарламада.
Неке ұзақтығы бойынша ажырасулардың ең көп үлесі (35%) 1-4 жыл некеде тұрған отбасылар арасында, ажырасулардың 25% — 5 жылдан 9 жылға дейін бірге тұрғандар арасында, тағы 8% неке тіркелгеннен кейін бір жыл ішінде ажырасқан.
