Қысқы демалыста Түркияда демалған қызылордалық екі мұғалім бірнеше мәрте трансвеститтер клубында көңіл көтерген. Мұғалімдердің бұл әрекетіне ата-аналар наразылығын білдіріп, олардың мектептен кетуін талап етті, деп хабарлайды kaskelen.kz тілшісі ZhasAlash басылымына сілтеме жасап.
Қызылорда облысы Қармақшы ауданына қарасты №250 мектептің ағылшын тілі пәнінің мұғалімдері Қызыл теңіз жағасында тынығу үшін мектеп әкімшілігін ескертіп, ақысыз демалыс алуды шешкен. Бірақ та кейін ұстаздардың Түркиядағы трансвеститтер клубында демалған видеолары әлеуметтік желілерде тарап кетіп, ата-аналардың наразылығын тудырған.
“Екеуі де ағылшын тілі пәнінің мұғалімдері, жас мамандар. Біреуінің “магистр” атағы бар. Ұстаздардың әрекетін педагогикалық кеңесте талқылап, жиналысқа әдейілеп тек әйел мұғалімдерді қатыстыруды жөн көрдім. Жиналыстан кейін ұстаздар өз еріктерімен жұмыстан кету туралы арыздарын жазды. Олар тек ұстаз емес, сонымен қатар әйел кісілер, бала тәрбиелеп отырған ана. Әріптестеріміздің мұндай әрекетке барғандары өте ұят болды”, – деп мәлімдеді мектеп директоры Гүлжахан Нарбаева.
