Премьер-министрдің орынбасары Тамара Дүйсенова шекаралық аудандардағы халықтың айлығы мен әлеуметтік төлемдеріне үстемеақы қосу мәселесіне пікір білдірді, деп хабарлайды kaskelen.kz тілшісі.
– Біздің Ұлттық экономика министрлігі 50 шақырым радиуспен деп жалпыламай, шекаралық ауданға жататын елді мекендердің нақты тізбесін беру керек. Ол елді мекендерде қанша азамат тұратынын, қандай мекемелер жұмыс істеп тұрғанын, олардың жұмысшыларына үстемеақыны қандай жолмен қоюымыз керек? Осының бәрін есептеу керек. Мәселе қаражат есептеуге байланысты. Қазір неше пайыз болатыны әлі анықталған жоқ, – деді Тамара Дүйсенова.
Сонымен қатар ол Семей мен Арал өңіріндегі экологиялық үстемеақыларды көтеру жоспарда жоқ екенін айтты.
– Біз үстемеақылар емес, еңбекақыны көтеруіміз керек. Үстемеақы деген еңбекақыға есептелетін ақы. Біз мұғалімдер мен дәрігерлердің еңбекақысын екі есе көтердік. Ауылдағы мемлекеттік қызметкерлер мен азаматтық қызмет мамандарының айлығы біртіндеп көтеріліп келе жатыр. Әлеуметтік қамсыздандыру саласындағылардың айлығын көтеру биыл аяқталып жатыр. Сондықтан мемлекеттік бюджеттен айлық алатындардың еңбекақысы толығымен біртіндеп көтеріліп келеді. Ал жеке меншіктегі жұмысшылардың мәселесін әлеуметтік жауапкершілік арқылы шешу бағытында жұмыс істеп жатырмыз, – деді Тамара Дүйсенова.
