Әлеуметтік желіде жедел жәрдем көлігі жүргізушісін соққыға жыққаны үшін ұсталған Нұрболат Дәкебаевтың кешірім сұраған видеосы таралуда, деп хабарлайды kaskelen.kz порталы.
Видеода ол қазақстандықтар мен медицина қызметкерлерінен кешірім сұрап, жасаған қылмысы өзіне маза бермей жатқанын айтты.
“Құрметті қазақстандықтар, 2024 жылғы 1 ақпанда өзім барып берілемін. Себебі жасаған қиянатым маза бермей жатыр, анамды да қатты алаңдаттым. Бәрінен және медицина қызметкерлерінен кешірім сұраймын. Ешкімге зиянымды тигізгім келмеді. Менен жәбір көрген бауырымнан, мұсылман-бауырлардан кешірім сұраймын. Мен өз қателігімді түсіндім. Алла разылығы үшін кешіріңіздер”, – деді Дәкебаев видеода.
Видео ұсталғанға дейін түсірілген көрінеді. Оны әлеуметтік желіге қамауға алынған азаматтың жақындары таратып жатыр.
Алайда Қарағанды облыстық полиция департаментінің баспасөз қызметі Дәкебаев өз еркімен полицияға берілді деген ақпаратты жоққа шығарды.
Зардап шеккен жедел жәрдем көлігінің жүргізушісі Төреғали Берікқалиұлы қазір ауруханада. Оның сөзінше, мұрнына екінші ота жасалуы қажет. Ол пікір білдіруден бас тартты.
“Қазіргі уақытта Дәкебаев уақытша ұстау изоляторына қамалды, оған жасаған қылмысы үшін берілетін ең жоғары жаза – үш жылға дейін бас бостандығынан айыру”, – делінген хабарламада.
