“ПК Asar Baspana” компаниясының басшыларына қатысты қаржы пирамидасын басқарды деген күдік бойынша сотқа дейінгі тергеп-тексеруді Қаржы мониторингі агенттігінің Шымкент қаласы бойынша департаменті жүргізед, деп хабарлайды kaskelen.kz порталы АФМ баспасөз қызметіне сілтеме жасап.
“Компания жеке тұлғалардың ақшасын кәсіпкерлік қызметке пайдаланбай тартып, оны қатысушылар арасында қайта бөлді. Залал сомасы 700 млн теңгеден асады. Сотқа дейінгі тергеу жалғасуда. ҚР ҚІЖК-нің 201-бабына сәйкес өзге де ақпарат таратылуға жатпайды.
Егер сіз және сіздің жақындарыңыз аталған қаржы пирамидасының қызметіне тап болса, тұрғылықты жері бойынша экономикалық тергеу департаментіне хабарласуыңызды сұраймыз”,- деп атап өтті баспасөз қызметі.
Қазақстандықтарды қырағы болуға және өз жинақтарын күмәнді қаржы ұйымдарына салмауға шақырды.
ҚР Конституциясының 77-бабы 3-тармағының 1-тармақшасына және ҚР Қылмыстық іс жүргізу кодексінің 19-бабы 1-бөлігіне сәйкес адам қылмыстық құқық бұзушылық жасаудағы кінәсі заңды күшіне енген сот үкімімен белгіленгенге дейін кінәсіз деп есептеледі.
