Қытайдың Ханчжоу қаласында өтіп жатқан Азия ойындарында қазақстандық жаттықтырушы мас күйінде ұйықтап жатқан жерінен табылып, Қазақстанның өкілдеріне берілген деген ақпарат тарады деп хабарлайды Kaskelen.kz
Мұны Қытайға барған спорт журналисі Аслан Қаженов растады.
Қазақстан Ұлттық құрамындағы академиялық ескек есу спортының жаттықтырушысы ішімдікке тойып алып, мас болып Қытай көшесінде құлап жатқан. Оны кейін қазақстандық өкілдерге жеткізіпті.
“Мұны бапкерлер растады. Өте масқара жағдай. Оның не себепті ондай қадамға барғаны және оған қатысты қандай шара қолданылатыны әзірге белгісіз”, – деді спорт журналисі.
Журналист Ұлттық құрамадағы легионерлер нашар нәтиже көрсетіп жатқанын да жасырмады.
“София Сподаренко деген легионер Ресейдің үздігі, шенеуніктер “мынау міндеттті түрде медаль әпередіі, ертең Парижде де медаль әпереді” деп айтты. Бүгін финалға шыға алмапты, көріп көңілім түсіп кетті. Жарайды, қазақ қыз-жігіттері жеңіліп жатса түсінесің. Бірақ біз бұларды әкеліп, бірден ұлттық құрамаға қосып тұрмыз. “Жүлде бермейсің бе енді?” деген сияқты сұрақтар болады. Олар бәрібір бөтен, жақын қабылдай алмаймыз. Өз басым шетелден, әсіресе Ресейден спортшылар әкелуге қарсымын. Өйткені олардың спортшылары әлемде масқара болып жатыр, жеңіске жетсе басқа спортшылар құттықтамайды да. Осындай кезде топырлатып әкеліп, өзіміздің балалардың жолын жабудың керегі жоқ. Әкеле беретін болсақ, бізге ресейлік спортшыларға жол ашып берді деп санкциялар қолдануы мүмкін. Қазір спорт та саясат болып кетті ғой. Сондай кесірі тиіп, бүкіл Қазақстан құрамасының жолы жабылып қала ма деп қорқасың”, – дейді Аслан Қаженов.
