Қайындыға барар жолда автобус пен УАЗ соқтығысып, 1 адам қаза тапты

Қайыңдыға апарар жолда туристер мінген автобус пен УАЗ көлігі соқтығысып, салдарынан бір адам қаза тапты, деп хабарлайды kaskelen.kz ақпараттық порталы облыстық Полиция департаментіне сілтеме жасап.

Қайғылы оқиға туралы Алматы облысының полиция басшысы Бауыржан Әленов мәлімдеді. Оқиға Кеген ауданы Сатин ауылдық округі аумағында Қайыңды-Саты тау жолының бойында болған. Тоғызыншы шақырымда қарсы бағытқа шығып келе жатқан 47 жастағы автобус жүргізушісі 1997 жылы туған О. басқарған УАЗ көлігімен бетпе-бет соқтығысқан.

“Жол апаты салдарынан 36 жастағы жолаушы оқиға орнында көз жұмды. 6 адам ауруханаға жатқызылды. Зардап шеккен 34 адамның 20-сы – әйел, 14-і – ер адам”, – делінген хабарламада.

Дәрігерлер барлық науқастардың жағдайын орташа ауыр деп бағалап отыр.

Аталған дерек ҚР ҚК 345-бабының 3-бөлімінде көзделген қылмыстық құқық бұзушылық белгілері бойынша Кеген ауданы ПБ-да тіркелді.

Қазіргі уақытта осы жол-көлік оқиғасының барлық мән-жайларын объективті зерттеуге бағытталған сараптама тағайындаумен қажетті тергеу әрекеттері жүргізілуде. Автобус жүргізушісі Кеген ауданы ПБ УҰИ-ға қамаққа алынды.

Айта кетейік, істі облыстық полиция бастығы мен Алматы облысының әкімі бақылауға алды.