Мәдениет және ақпарат министрі Аида Балаева, Қазақстан заңнамасында ниқабқа тыйым салатын норманың жоқтығын айтты, деп хабарлайды kaskelen.kz тілшісі.
Министр ниқаб кию мәселесіне қатысты пікір білдірді. Оның айтуынша ендігіде бетін бүркеп алатындарға талап күшейеді.
“Заң аясында бұл мәселе әлі реттелмеген. Бетін тұмшалайтындар туралы біз енді қарайтын боламыз. Өйткені депутаттар осыны сауал ретінде жолдады. Қазір оны жан-жақты зерделеп жатыр. Бұл ұлттық қауіпсіздік мәселесі екенін айтқанмын. Әрине, ұлттық қауіпсіздік тұрғысынан қарағанда, ниқабтарға тыйым салған дұрыс”, – деді Аида Балаева.
Бұл мәселеге қатысты премьер-министр Әлихан Смайылов жазбаша жауап берді. Ол аталған мәселелер үкіметтің тұрақты бақылауында екенін жеткізді.
“Үкімет діни қызмет саласындағы заңнаманы, атап айтқанда “деструктивті діни ағым” және “діни радикализм” ұғымдарын енгізу; деструктивті діни ағымдарды ұстанушылармен оңалту жұмысын заңнамалық қамтамасыз ету; діни әдебиеттерді, ақпараттық материалдар мен діни мақсаттағы заттарды таратуға мүмкіндік беретін субъектілердің тізбесін әзірлеу; интернет-ресурстар; қоғамдық орындарда бетті тануға кедергі келтіретін киім заттарын киюге шектеулер енгізу және т. б. жетілдіру бойынша жұмыс атқарылуда. Аталған түзетулерді талқылау және келісілген шешім әзірлеу мақсатында ҚМДБ-мен, теологтармен, сарапшылар қауымдастығы және мүдделі мемлекеттік органдармен бірлескен отырыстар, дөңгелек үстелдер мен семинарлар өткізіліп жатыр”, – делінген Смайылов жауабында.
Еске сала кетейік, бұған дейін Аида Балаева Қазақстанда хиджаб пен басқа да діни киімдерді қоғамдық орындарда киюге тыйым салынуы мүмкін екенін айтқан еді.
Сондай-ақ министр ел ішінде талқыға түскен хиджаб мәселесіне қатысты сұраққа жауап беріп, кейбір діни киімдерге ғана шектеу қойылатынын мәлімдеген. Бірақ бұл қадамның хиджабқа мүлдем қатысы жоқ.
