Айтыскер ақын Айнұр Тұрсынбаеваның келіні, блогер Мадина Жәниева қазіргі таңда өзекті тұрмыстық зорлық-зомбылыққа қатысты пікір білдіріп, жеке парақшасында жазба жариялады, деп хабарлайды kaskelen.kz порталы.
“Біздің менталитетіміз бен салт-дәстүрімізде ер адамдардың абыройы биік. Олардың тарапынан болатын түрлі іс-әрекеттер әйел үшін қалыпты жағдайға айналмауы керек. Әйелдер, үнсіз қалмаңыздар! Еркектері бір саты жоғары тұратын қоғамның қыздары шетелдіктерге күйеуге шығуға мәжбүр. Осыдан кейін шетелдік күйеубалаларды сөз етіп, қыздарымызды жамандауға ешкімнің құқығы жоқ. “Ер мен әйелдің құқығы – тең” деген қағидамен өмір сүруге болады”, – дейді ол.
Тұрмыстық зорлық-зомбылықты көріп, үндемей жүрген әйел қауымына да айтары аз емес.
“Құрметті әйел қауымы! Сізге қол көтеріп, балағаттайтын, ұрып-соғатын қарым-қатынастан қашыңыз! Өйткені зорлық-зомбылықтың немен аяқталатынын ойлау – өте қорқынышты. Сіз жеке тұлғасыз сондықтан ешкімнің балағаттап, күндеуіне жол бермеңіз! Көмек сұраудан ұялмаңыз! Сонда ғана біз Жаңа Қазақстанға аяқ басамыз. Ескі түсінікпен өмір сүру біздің болашағымызды кешуілдетеді”, – дейді айтыскер ақынның келіні.
