Ер адам банк бөлімшесінде кеңесші болып жұмыс істейтін әйеліне барып, кеудесі мен иығына пышақ сұққылаған. Оқиға Хромтаудағы банктердің бірінің бөлімшесінде орын алды, деп хабарлайды kaskelen.kz тілшісі “Диапазон” порталына сілтеме жасап.
Жанжал кезінде пышақтың жүзі сынып, әйелдің иығында қалып қойған. Соған қарамастан ер адам жұбайының денесі мен басынан соққылауын жалғастырған. Кейін ол оқиға орнынан қашып кеткен. Жағдайдың бәрі жәбірленушінің әріптестерінің көз алдында болады. Болған істен кейін әйел ауруханаға жеткізілген.
Басында әйелін соққыға жығып, пышақпен шабуыл жасаған ер адамға “кісі өлтіруге оқталғаны үшін” деген айып тағылды. Жәбірленуші олардың баласы бар екенін, күйеуі алкогольді асыра пайдаланатынын, шөп шегетінін, оны және анасын өлтіремін деп қорқытқанын айтты. Ол жұбайын кешірмейтінін, соттан оны бас бостандығынан айыруды сұрады.
Сізге ұнауы мүмкін
Сотта айыпталушы әйелін өлтіргісі келмегенін жеткізді. Оның айтуынша, керісінше “отбасын сақтап қалғысы” келген. Сот процесі барысында прокурор істі “кісі өлтіруге оқталу” бабынан “пышақ пайдалану арқылы бұзақылық жасау” айыбына ауыстырды. Сот та “бұзақылық жасады” деген айып дұрыс деп санады. Өйткені сотталушы жұбайына қоғамдық жерде пышақпен шабуыл жасап, денсаулығына жеңіл зиян келтірген. Сот ер адамды “бұзақылық жасағаны үшін” алты жылға бас бостандығынан айыру туралы үкім шығарды. Үкім жарияланған кезде айыпталушы мен жәбірленуші ажырасып кеткен еді.
