Алматылық қыз бірнеше күн сексуалды құлдықта болғанын жария етті. Қызды белгісіздер ұрлап, жезөкшелікпен айналысуға мәжбүрлеген, деп хабарлайды kaskelen.kz порталы КТК арнасына сілтеме жасап.
Бойжеткен сексуалды құлдықтың құрбанына айналғанын айтты. Оны қатыгездікпен ұрып-соғып, қызмет көрсетуге мәжбүрлеген. Кейін қыз қашып үлгеріп, полицияға жүгінді. Полиция жеке үйде басқа қыздардың да құлдықта болғанын анықтады.
Сексуалды құлдықтан қашып шыққан қыздың құлағы сынып, басы жарылған, бүкіл денесі көгерген.
“Алдымен олар мені қазанмен ұрды, содан кейін арқамды ұзартқыш сыммен ұра бастады. Аяқ-қолымды жаралады. Мені Камила мен Аида дегендер ұрды”, – деді жәбірленуші.
Қыздың айтуы бойынша, ол бір апта бұрын әдеттегідей жұмыстан шығып, үйіне қайтып жатқан. Сол кезде көлік тоқтап, ер адамдар оны көлікке салып алған.
“Олар жезөкшелік қызмет көрсетуге мәжбүрледі. “Егер келіспесең, ата-анаңа жезөкше екеніңді айтып, құжаттарыңды көрсетеміз” деді, – деп айтты қыз.
Ол жұмыстан оралмағаннан кейін туыстары дабыл қағып, іздеуге шықты. Бірнеше күннен кейін алматылық бойжеткен байланысқа шығып, қайда екенін айтып берген.
Қазіргі таңда қыз қорқынышпен өмір сүруде. Тіпті дәрігерлерден көмек сұрауға қорқады.
Көршілер үй баяғыдан притонға айналғанын айтады. Үй иелері құқық қорғау органдарын алғашында кіргізгісі келмеді. Бірақ тәртіп сақшылары бірнеше қызды тапты. Үйдің барлық тұрғындары жеке басын анықтау үшін ұсталды. Қазір іс бойынша сотқа дейінгі тергеу басталды.
