Қазақстанда кейбір жолдар жыл сайын жөндеуден өтеді. Оның себебін Көлік министрі Марат Қарабаев түсіндірді, деп хабарлайды kaskelen.kz.
«Жолдардың жөндеудің бірінші түрі – ағымдық, ол жыл сайын жүреді. Екіншісі – технология бойынша әр бес жыл сайын жасалатын орташа жөндеу. Үшінші түрі – күрделі жөндеу, жолдар 15 жылдан кейін жөнделеді. Сіз айтып отырған жыл сайын жүргізілетін учаскелер орташа жөндеуден өтіп жатыр. Жолда шұңқырлар пайда болады, сондықтан ағымдағы жөндеуден кейін орташа жөндеу жүргізіледі. Бұл жол саласы үшін қалыпты жағдай, бұл жерде мәселе сапаға келіп тірелмейді, көптеген фактор бар. Мысалы, ауыр жүктерге қатысты, нормаларға сәйкес, жолға түсетін жүктеме 25 тонна болуы керек, ал кейде 100 тоннадан асып кетеді. Бұл жолды бұзады, осыған байланысты қосымша жөндеу жұмыстарын талап етеді», – деді Марат Қарабаев Мәжіліс алаңында БАҚ өкілдерінің сауалына жауап бере отырып.
Сонымен қатар, министр жолдарды жөндеуге бөлінетін қаржының жетіспейтінін айтып отыр.
Бұған дейін М.Қарабаев тасқын су басқан республикалық жолдарды жөндеуге 8,5 млрд теңге керек екенін айтқан еді.
