Сенат депутаты Нұрия Ниязова Мәдениет және ақпарат вице-министрі Қанат Ысқақовтан шетелдік журналистерді аккредиттеу тәртібі туралы сұрады, деп хабарлайды kaskelen.kz порталы.
«Менің сұрағым өзге елдердегі қызметі қандай да бір елдің мемлекеттік құрылымын бұзуға бағытталды деп бағаланған журналистермен байланысты. Бізде сондай журналистердің тізімі бар ма? Ондай тұлғалардың елімізге кіруіне және ақпараттық қызметіне тыйым салу қалай белгіленген?» – деп сұрады сенатор.
Қанат Ысқақовтың айтуынша, бұл мәселе қоғамда көп пікірталас туғызған.
«Бізде Ақпарат министрлігі ретінде ондай деректер жоқ. Бірақ бұл мәселеге жүйелі түрде келгенімізді айтамын. Заң жобасында шетелдік БАҚ пен журналистерді аккредиттеумен Сыртқы істер министрлігі айналысатыны туралы нормалар бар. Сонымен бірге Сыртқы істер министрлігінің Қазақстан заңнамасы аясында аккредиттеуден бас тартуға немесе аккредитация мерзімін созудан бас тартуға, аккредитацияны қайтарып алуға құқығы бар. Бұл Сыртқы істер министрлігіне қандай да бір журналистің әрекеті Қазақстанның егемендігіне, аумақтық тұтастығына зиян келтіретін болса, бүкіл қажетті әрекеттер қабылдауға мүмкіндік береді. Бұл норма «Масс-медиа туралы» заңның жобасында бар», – деді Қанат Ысқақов.
Сыртқы істер министрінің бірінші орынбасары Ақан Рахметуллин жаңа заңда бұл мәселемен байланысты нормалар қалай өзгергенін түсіндірді.
Сізге ұнауы мүмкін
«Бұрын аккредиттеу жай ғана ережеде болған. Ол ереже бойынша біз шетелдік журналистерге аккредитация бермесек те, жұмыс істеуге құқығы бар болатын. Өйткені сондай заңға ілеспе акт болған. Ал қазір «Масс-медиа туралы» заңның 30-бабында шетелдік журналистердің қызметін реттеуге толық құқық болады», – деді ол.
