Бас прокуратураның құқықтық статистика және арнайы есепке алу комитеті «Қазпошта» АҚ жұмысының Әкімшілік рәсімдік-процестік кодекс талаптарына қаншалықты сай екенін тексерді, деп хабарлайды kaskelen.kz порталы.
Тексеру барысында жолданымдарды тіркемеудің 10 мыңнан астам фактісі, 2 мыңға жуық мемлекеттік құқықтық статистиканы бұрмалау, жолданымды уақтылы тіркемеудің 249 фактісі, өтінішті қарау мерзімін бұзудың 94 фактісі және өзге де кемшіліктер анықталды.
Бұдан бөлек, «Қазпошта» АҚ пайдаланатын электронды құжат айналымы жүйесін құжаттау, пайдалану тәртібін реттейтін құқықтық актілер Әкімшілік рәсімдік-процестік кодекс талаптарына сәйкес келмегені анықталды.
Тексеру нәтижелері бойынша комитет және оның аумақтық органдары заң бұзылуын жою туралы 21 ұсыным енгізді, 20 әкімшілік іс қозғалды.
Қадағалау актілерінің қаралу нәтижесінде 48 қызметкер тәртіптік жауапкершілікке және 20-сы әкімшілік жауапқа тартылды.
Сондай-ақ, құқық қорғау органдарына хабарланбаған бөтеннің мүлкін ұрлау, сонымен қатар алаяқтық фактілері анықталды, осылайша аталған қылмыстар есепке алынбай, олар бойынша процестік шешім қабылданбаған.
Осы орайда комитеттің бастамасы бойынша «Қазпошта» АҚ филиалдары арқылы жіберілген сәлемдемелерді ұрлаудың 3 фактісі, сондай-ақ коммуналдық қызметтерді төлеу үшін қабылданған ақшалай қаражатты ұрлау дерегі тіркелді.
