2025 жылы елімізге 3 млн-ға жуық шетелдік келуі ықтимал. Бұл туралы Ішкі істер министрлігі Көші-қон қызметі комитетінің төрағасы Аслан Аталықов айтты, деп хабарлайды kaskelen.kz порталы.
– Соңғы жылдары елге келуші шетелдіктердің саны артуда. Былтыр елімізге 15 млн-нан астам шетелдік кіріп-шықты. Бұл өткен жылмен салыстырғанда 1 млн-ға артық. Биыл Қазақстанға 2 млн 800 мың шетелдіктің кіруі белгіленді. Келушілердің 40 пайызын өзбекстандықтар құрайды. Екінші орында – Қырғызстан азаматтары, одан кейін – Ресей азаматтары, – деді ол Орталық коммникациялар қызметіндегі брифингте.
Оның айтуынша, елімізге келген шетелдіктердің барлығы қалмайды. Көбі қайта шығады немесе транзитпен өтеді.
– Тұрақты тұрып жатқан шетелдіктердің саны 200 мыңға жуық, олардың 50 мыңы – қандастарымыз, 87 мыңы – Ресей азаматтары, 49 мыңы – Өзбекстан және 11 мыңы – Қырғызстан азаматтары. Көпшілігі Астана мен Алматы қаларында және Алматы мен Қарағанды облыстарында тұрып жатыр, – деді Аслан Аталықов.
Еске сала кетейік, бұған дейін Қазақстанға шетелден білімді адамдар жиі қоныс аудара бастағаны мәлім болған еді.
Сізге ұнауы мүмкін
