Алматы облысы Қарасай ауданы Батан ауылының тұрғындары таза ауыл суға жарымай отыр. Одан бөлек бұл жерде интернет тұрмақ, ұялы байланыс ұстамайды екен, деп хабарлайды kaskelen.kz тілшісі.
Географиялық жағдай бойынша Батан ауылы Жамбыл ауылдық округіне қарайды. Қалаға тиіп тұрған ауыл тұрғындары ауызсуға жарымай отыр. Көктемде егістікті суару тұрмақ, ішетін су табылмай қалады екен.
“Ауыз су ала жаздай болмай қалады. Жеке сорғы құралы барлар үйді-үйіне суды сол арқылы жеткізеді. Мысалы менің үйім шағын, мен ол сорғыны 30 мың теңгеге сатып алдым. Сол арқылы тартпасақ, су өздігімен келмейді. Жылда бір насос сатып аламыз. Ал үйлері үлкен тұрғындар одан да қымбатын сатып алады. Сосын жыл сайын жаңадан алуымызға тура келеді, өйткені насос бір жылдан соң іске жарамайды”, – дейді Батан ауылының тұрғыны Гүлғайша.
Насосты орнатуды әркімнің қалтасы көтере бермейді. Өйткені ол 7-8 ай бойы үздіксіз жұмыс істейді. Электр энергиясына қосылып тұруы шарт. Тұрғындардың айтуынша, қыс айларында электр жарығына 3-4 мың төлейді. Ал су тоқтаған мезгілде бұл сома 5 мыңнан асып жығылады екен.
Цифрлық даму министрі Бағдат Мусин “Қазақстан интернет жылдамдығы бойынша Жапониядан асты” деп жар салып еді. Министрдің бұл сөзіне қарап, әр елдімекенде 5G интернет желісі қосылып тұр деген ойда қаласың. Батан ауылы Қазақстанда емес-ау шамасы. Себебі бұл елдімекен тұрғындары интернет тұрмақ, ұялы байланыстың қызығын көре алмай келеді.
“Қателеспесем міне 5 жылға жуықтады, ұялы телефон байланысы өте нашар. Интернетке кіру былай тұрсын, қоңырау соғып, сөйлесе алмаймыз. Әбден мезі етті. Мейлі қай ұялы байланыс болсын бәрі нашар тартады”, – деп шағымданды ауыл тұрғыны Айгүл Есжанова.
“Батан ауылында бір су ұңғымасы орналасқан. Қазіргі таңда жаңа құрылыс ауласы көбеюіне байланысты, қосымша ұңғыма орнату үшін жер іздестіріліп жатыр”, – дейді Жамбыл ауылдық округінің әкімі Еламан Өмірбаев.
Батан ауылы Саламатов көшесі мекен-жайында орны белгіленіп, барлық қажетті құжаттары рәсімделді. Қазіргі таңда, мердігер мекемемен ұялы телефон мұнарасын орнату бойынша құрылыс жұмыстары басталды”, – дейді халық қалаулысы.
