Алматы облысына қарасты Қаскелең қаласында саябақ қашан салынады деген сұрақ тұрғындар көкейінде жүргелі біраз болды. Осы сауалға жауап алу мақсатымен kaskelen.kz тілшісі Алматы облысы әкімдігіне сауал жолдады.
Журналистік сауалға облыстық энергетика және тұрғын үй-коммуналдық шаруашылық басқармасы жауап берді.
“Қарасай ауданы Қаскелең қаласына саябақ салуға жер телімінің жоқ болуына байланысты қаражат қарастырылмағандығын хабарлаймыз”, – делінген ресми хатта.
Осы орайда тұңғыш президент шыққан аты дардай ауданда бір саябақ салу әу-бастан бас жоспарда қарастырылмаған ба деген сауал туындайды. Тіпті тұрғындар саябаққа арналған жер де сатылып кетуі мүмкін бе деген пікір білдіруде.
“Қаскелеңге ешқашан қаражат жоқ. Бізде тек көлік жуатын орындар мен ғимараттар ғана салынып, кейін жалға беріледі. Бар жасайтыны осы. Балалар мен егде жастағы қарияларға серуендейтін жер де жоқ. Сұмдық”, “Барыс базарының орнына салмайсыңдар ма. Ең дұрыс жер сол”, “Иә, бір каскелен тұрғындары болып әкімге отініш жасасақ болмай ма? Қаламызға бір парк жасап берсе. Балдарымызбен барып отыратын, қарт кісілерге отыратын. Соны қолға жаксы болар еді”, – деп пікір жазды тұрғындар.
“Жаздай балаларымыз қайда барып демалатынын білмей, көше-көше болып сабылып жүреді. Кейбір көшелерде тіпті тротуар да жоқ. Шаң-шаң, тазаланбайды да. Қаскелеңнің қала деген аты бар емес пе?”, “Бос жатқан жердің бәрі сатылып кеткен болды ғой”, “Менде бүкіл Қазақстанды айналып шыққан шығармын, болмайтын бір колхоз, совхоздын өзінде саябақ бар. Ал Қаскелең – тұңғыш президент шыққан жер. Онымен қоймай қала деген атағы бар. Айта берсең көп. Бірақ саябақ жоқ. Ұят-ай”.
