2024 жылғы 1 қыркүйектегі жағдай бойынша 72,7 мың отбасынан 385,6 мың адамға атаулы әлеуметтік көмек көрсетілді. Биыл бұл мақсатқа бюджеттен 55,9 млрд теңге қарастырылған, деп хабарлайды Еңбек және халықты әлеуметтік қорғау министрлігі.
АӘК-нің негізгі мақсаты – ақшалай төлемдер түрінде қолдау көрсету және еңбекке қабілетті отбасы мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.
АӘК мыналарды көздейді: – табысы облыстық ең төменгі күнкөріс деңгейінің 70%-нан аспайтын азаматтарға тоқсан сайын әлеуметтік көмек тағайындау;
- аз қамтылған отбасылардағы 1 жастан 6 жасқа дейінгі әрбір бала үшін 1,5 АЕК (5 538 теңге) мөлшерінде ай сайынғы қосымша төлемді қамтамасыз ету. 2024 жылғы 1 қыркүйекте АӘК алушылар қатарынан 119,5 мың мектеп жасына дейінгі балаға 3,7 млрд теңге сомасында қосымша төлем тағайындалды;
- жұмысқа орналастыру арқылы жұмысқа орналасуға жәрдемдесу, өз ісін ашқысы келетін отбасыларға гранттар беру, біліктілікті арттыру курстарына жіберу (қажет болған жағдайда) және т.б.
Қазіргі уақытта Қазақстандықтар тұрғылықты жері бойынша мансап орталығына, ауылдық округ әкіміне, сондай-ақ “электрондық үкімет” порталына АӘК тағайындауға өтініш (egov.kz) бере алады.
