Алматыда Ақкент ықшам ауданына қарасты көпқабатты үйден өрт шығып, 30-дан астам адам зардап шекті, деп хабарлайды kaskelen.kz тілшісі Алматы қаласы Төтенше жағдайлар департаментіне сілтеме жасап.
Өртенген үйдің видеосы желіде тарады. Видеодан бас сауғалаған адамдардың ғимараттың терезелерінен секіргенін байқауға болады.
ТЖД хабарлауынша, 16 қабатты тұрғын үйдің бесінші қабаттағы пәтерлері ашық отқа оранған. Сондай-ақ 5 және 6-қабаттағы лифттің электр кабельдері өртенді.
Ауруханаға 31 адам жеткізілді, оның 16-сы балалар. Денсаулық сақтау басқармасының хабарлауынша, көз жұмғандар жоқ. ТЖД көмегімен 80 адам құтқарылып, 200-ден астам тұрғын эвакуацияланды.
“Өте сұмдық болды. Адамдар шыңғырып терезеден секірді. Әйелдер балаларын лақтырды”, – дейді тұрғындар.
Өртенген үйге ең бірінші болып үй маңында жұмыс істеп жүрген құрылысшылар келген. Дереу кілем, көрпе тасып секірушілерге жағдай жасаған.
“Бірінші қабаттағы бір терезені шағып, ішінен көрпе, матрас алып шықтық. Адамдардың үрейі ұшып кетті”, – дейді құтқаруға қатысқан тұрғындардың бірі.
Өрт сөндірушілер тұрғын үйде өрескел заңбұзушылық болғанын айтады. Ертең өрт болған үйдегі кемшіліктерге ТЖД тексеру жүргізеді.
Тұрғын үй балкондарындағы өрт баспалдақтарын тұрғындар бітеп тастаған. Өрт сөндіру көліктері кіре алмаған. Өйткені жекеменшік машиналардан өту мүмкін емес.
