2024 жылдың бірінші тоқсанының қорытындысы бойынша Қазақстандағы жұмыссыздар саны 1,52 пайызға, яғни 6,8 мың адамға өсті, деп хабарлайды kaskelen.kz тілшісі.
Өткен жыл бойына Қазақстанда жұмыссыз азаматтардың саны біртіндеп төмендеді. Мысалы, 2022 жылдың 4-тоқсанында республикада олардың саны 456,1 мыңнан астам болса, 2023 жылдың басында 453,5 мың адамды құрады, ал 2023 жылдың 4-тоқсанында небәрі 445,9 мың адам болған.
Бірақ 2024 жылдың 1-тоқсанында жағдай өзгерді. Ұлттық статистика бюросының мәліметінше, жұмыссыздар саны 1,52 пайызға, яғни 6,8 мың адамға өсіп, 452,7 мың адамға жеткен.
Алайда бұл көрсеткіш әртүрлі жағдайларға байланысты айтарлықтай ерекшеленеді. Мысалы, ауылдарға қарағанда қалаларда жұмыссыздар көп – ауылда 170 мың, ал қалада 283 мың.
Әйелдерде де солай – ерлерге (211 мың) қарағанда олардың арасында (242,2 мың) жұмыссыздар әлдеқайда көп. Сондай-ақ нақты жұмыссыздық деңгейі де әртүрлі. Әйелдер арасында ол 5,2 пайызды, ерлер арасында 4,2 пайызды құрады.
Жалпы жұмыссыздық деңгейі өткен жылы өзгеріссіз болып, 4,7 пайыз деңгейінде қалды.
Айта кететін жайт, жұмыссыз қазақстандықтардың барлығы “өз еркімен” жұмыссыз емес. Ресми деректерге сәйкес, 2024 жылы 44,6 мыңға жуық адам жұмыстан шығарылды, тағы 90,6 мың адам отбасылық себептермен жұмыстан кетуге мәжбүр болды.
Еске сала кетейік, Қазақстанда жұмыссыз азаматтардың мемлекет қолдауына үміт артып, жұмысынан айырылғаны үшін әлеуметтік жәрдемақы алуына болады.
Сонымен қатар жұмыссыздарға жұмыс табуға көмек те көрсетіледі. Мысалы, тасқыннан зардап шеккен өңірлерді қалпына келтіруге жұмыссыздарды тарту жоспарланып отыр. Бұл аймақтарға білікті мамандар да, арнайы білімі жоқ жұмысшылар да қажет.
