Биыл 2019 жылғы несиесі бар көптеген азаматтың қарызы кешірілген еді. Бірақ олар қайтадан қарызға белшеден батқан. Қазақстандықтардың жалпы қарыз сомасы 67,5 миллиард теңгеден асады, деп хабарлайды kaskelen.kz тілшісі Inbusiness.kz медиа-порталына сілтеме жасап.
2019 жылы Қазақстанда ресми түрде несие қарызын кешіру процедурасы жарияланған болатын. Ол үш кезеңнен тұрды, амнистия барысында 578 мыңға жуық азаматтың қарызы жойылды, жалпы кешірілген қарыз сомасы 120 миллиард теңгеден асты.
Бұл ретте несиесі есептен шығарылған азаматтарға жаңадан несие алуға тыйым салынбаған.
“Жоғарыда аталған көрсеткіштерге сүйенсек, 2023 жылғы 1 қазандағы жағдай бойынша 2020 жылы 1 қаңтардан кейін қарыз алған адам саны – 395 мың, алынған қарыз сома – 685 млрд теңге”, – делінген Inbusiness.kz хабарламасында.
Сонымен қатар қарыз алушылардың ішінде 70 мыңға жуығы немесе 9,9 пайызы өтеу мерзімін 90 күннен асырып, кешіктірген. Кешіктірілген қарыз мөлшері – 67,5 млрд теңге.
Осылайша 2019 жылы азаматтардың қарыз жүктемесін азайтуға бағытталған бағдарлама оларға тиімді нәтиже бермеген.
Еске сала кетейік, 2022 жылы шағын несиелер бойынша азаматтардың проблемалық берешегінің деңгейін төмендету мақсатында несиесін өтей алмайтын 567 мың қарыз алушының проблемалық берешегі реттелсе, 28 мыңға жуық азаматтың жалпы сомасы 600 миллион теңге көлемінде қарызы толық кешірілген болатын.
