Кеше Түркістан облысындағы Сырдария өзеніне демалуға барған 20 адамның 11-і суға батып кетті. Қайтыс болған бес бала және алты ересек адам ағайынды болып шықты. Түркістан облысы әкімдігі өкілі оқиғаның мән-жайын айтты, деп хабарлайды kaskelen.kz.
Облыс әкімдігінің баспасөз қызметі ақпаратына сәйкес, 21 тамызда сағат 18:00 шамасында тұрғындардан адамдар суға батып кеткені туралы хабарлама түскен. Шомылуға келген 20 адамның 11-і суға батып кеткен. Оның ішінде бес бала және алты ересек адам бар.
“Төрт ағайынды азаматтың отбасы отбасылық іс-шарадан қайтып келе жатып, демалуға өзенге тоқтаған. Сол жерде олардың балаларының бірінің аяғы тайып кетіп, ондағылар құтқаруға ұмтылған. Алдын ала ақпарат бойынша, олар бір-бірін құтқаруға тырысып, батып кетті. Олардың барлығы тойдан кейінгі киімде болған. Суға түсіп үлгермеген. Арнайы өзен жағасына суға шомылуға не демалуға бармаған”, – делінген хабарламада
ТДЖ мәліметінше, іздеу жұмыстары түнімен жүргізілді. Іздестіру нәтижесінде судан сегіз адамның денесі алынды, қалғандарына іздестіру жалғасады.
Айта кетейік, облыстық төтенше жағдайлар департаменті жанынан жедел штаб құрылып, оқиға орнына Отырар ауданы әкімдігінің, аудандық ТЖ, орман шаруашылығы бөлімінің қызметкерлері, еріктілер жіберілген. Олар бірден іздестіру шараларына кіріскен.
Еске салсақ, кеше, 21 тамыз күні Түркістан облысында 11 адам суға батып кеткені туралы хабарланған болатын.
