Абай облысында өртенген қарағайлы орманды қалпына келтіру үшін 40 жыл уақыт керек. Алапат өрттен 6 миллион текше метр ағаш жарамсыз болып қалған, деп хабарлайды kaskelen.kz тілшісі KTK арнасына сілтеме жасап.
Өрт кезінде діңгегі толықтай жанып кеткен қарағайларды дереу отау қажет. Себебі жанып кеткен ағаштарға зиянкестер үймелейді.
Ал өзегіне құрт түскен жағдайда қарағай еш нәрсеге жарамай қалады. Сондықтан мамандар өртенген 65 мың гектарға жуық алқапты тазартуды ақпан айында бастауды жоспарлап отыр.
Қазір олар өртенген алқапты қалың орманға айналдыруға жұмсалатын қаржыны есептеп жатыр.
“Семей орманы” МТОР бас директорының орынбасары Ғани Алпысшаловтың айтуынша, орманды қалпына келтіруге 40 жыл уақыт қажет.
“Енді біз оны тұқымбақта екі жыл бойы өсіреміз, жеткіземіз. Содан кейін ол ағаштарды алып орманға отырғызамыз. Сонда бір ағаштың өсіп-жетілуіне, үлкен орманға айналуына 40 жыл уақыт керек”, – дейді ол.
Еске сала кетейік, биыл 8 маусымда Абай облысы “Семей орманы” табиғи резерватының аумағында өрт шығып, салдарынан “Семей орманы” резерватының Новошульба филиалының 14 қызметкері қаза тапқан еді.
