World Population Review ұйымы алкогольді ең көп тұтынатын елдердің рейтингін жариялады. Қазақстан бұл тізімде әлем бойынша 68-орынға жайғасты, деп хабарлайды kaskelen.kz порталы.
Елімізде 15 жастан асқан тұрғындардың алкогольді тұтыну көлемі жан басына шаққанда жылына орта есеппен 6,38 литрді құрайды. Сарапшылардың мәліметінше, Қазақстанда ер адамдар жылына орташа есеппен 10,3 литр, ал әйелдер — 2,76 литр алкогольдік ішімдік ішеді.
Аталған рейтингте ТМД елдері арасында Ресей көш бастап, әлем бойынша бірінші орынға ие болды. Сонымен қатар, ең көп тұтынатын елдер қатарында Греция, Лесото, Мадагаскар және Джибути де бар. Ал ең төмен көрсеткіш Люксембург, Судан және Йеменде тіркелген.
ТМД аясында Қазақстаннан жоғары орын алған елдер — Ресей мен Беларусь қана. Қалған мемлекеттерде алкогольді тұтыну деңгейі төмен:
-
Молдова — 4,79 литр,
-
Армения — 4,28 литр,
-
Әзірбайжан — 2,49 литр,
-
Өзбекстан — 2,1 литр,
-
Түрікменстан — 1,26 литр,
-
Қырғызстан — 0,72 литр.
2024 жылы қазақстандықтар алкогольдік өнімдерге жан басына шаққанда орта есеппен 7,4 мың теңге жұмсаған. Бұл өткен жылмен салыстырғанда 13,6%-ға жоғары.
Алкогольге ең көп шығындалған — Шығыс Қазақстан облысының тұрғындары. Мұнда бір адамға шаққанда жылына 16,2 мың теңге жұмсалған, бұл көрсеткіш бір жылда 7,3%-ға артқан. Одан кейінгі орындарда Алматы (15,3 мың теңге), Қарағанды (13,9 мың теңге), Солтүстік Қазақстан (13,7 мың теңге) және Павлодар (12,9 мың теңге) облыстары тұр.
Ең аз шығын Қызылорда (1,3 мың теңге), Түркістан (1,5 мың теңге) және Маңғыстау (1,6 мың теңге) облыстарында тіркелген.
Бағаға келсек, 2024 жылдың сәуір айында Қазақстанда алкогольдік ішімдіктердің бағасы бір ай ішінде 1,2%-ға, ал бір жыл ішінде 10%-ға өскен. Атап айтқанда, бір айда арақ 0,9%, сыра 1,2%, шарап 1,5%-ға қымбаттаған. Жылдық көрсеткіш бойынша, арақ — 5,5%, шарап — 10,9%, сыра — 13,9%-ға қымбаттаған. Алкоголь бағасының жылдық өсуі елдің барлық 20 өңірінде байқалған.
