26 қаңтарға қараған түні Алматы облысында сағат 02:01-де жер сілкінді. Жер дүмпуінің эпицентрі Қытайда болған, деп хабарлайды kaskelen.kz.
Жер сілкінісін төтенше жағдайлар министрлігінің сейсмикалық стансалар желісі тіркеді.
“26 қаңтарда Алматы уақыты бойынша сағат 02:01:28-де төтенше жағдайлар министрлігінің “ННЦСН” және “И” ЖШС сейсмикалық станциялар желісі жер сілкінісін тіркеді. Жер сілкінісінің ошағы Қытайдағы Алматы қаласынан оңтүстік-шығысқа қарай 262 шақырым жерде. Магнитудасы MPV – 5,7. Алматы қаласы, Талғар қаласында 2 балға жеткен” – делінген хабарламада.
Сейсмологтардың сөзінше, 23 қаңтарда Қытай мен Қырғызстан шекарасында жер сілкінген, оның сейсмикалық толқындары жақын маңдағы елдер, соның ішінде Қазақстан аумағына да тарады.
“Әдетте, мұндай жер сілкіністерінен кейін Алматы қаласының аумағына қауіп төндірмейтін, кейінгі 24 сағат ішінде 2 баллдан аспайтын көптеген афтершоктар болады. Сейсмикалық күшею процесі бірте-бірте әлсіреді және ол қалыпты режимге оралады”, – деп атап өтті Алматы қалалық ТЖД.
Еске сала кетейік, 23 қаңтарға қараған түні Алматыда жер сілкінісі болды. Астана уақытымен 00:09 мин 02 секундта алматылықтар қатты жер сілкінісін сезді. Төтенше жағдайлар департаментінің мәліметі бойынша жер асты дүмпуінің эпицентрі Алматының оңтүстік-шығысында, 264 шақырым жерде тіркелді. Магнитудасы 6,7 балл.
