Алматыда қалалық Мәслихаттың кезектен тыс XXI сессиясы кезінде қаладағы қоғамдық көліктің құнын 120 теңгеге көтеру шешімі қабылдады, деп хабарлайды kaskelen.kz порталы.
Алматы қаласы Мәслихатының депутаты, Құрылыс, сәулет, урбанистика және жер қатынастары жөніндегі тұрақты комиссиясының төрағасы Нұрсұлтан Шоқанов бұл өзгерістің себебін түсіндірді.
— Бізде субсидия рекордтық көрсеткішке жетіп отыр. Биыл тасымалдаушы компанияларға бөлініп отырған 97 млрд теңге Қызылорда, Талдықорған сынды облыстық маңызы бар қалалардың бюжетімен бірдей. Тариф пен субсидия мұндай бағытта жүре беретін болса, басқаруға келмейтін процесстерге алып келуі мүмкін. Сондықтан біз тариф бағасын біртіндеп көтеріп отырудан ешқайда кете алмаймыз. Біріншіден, жергілікті бюджетке түсетін жүктемені азайтуымыз керек. Бірақ бұл шағын өсім халықтың әлеуметтік осал топтарына әсер етпейді. Бүгінгі дейін кім тегін жүрсе, олар әрі қарай да тегін жүре береді, кімнің 50% жеңілдігі болса, бұл жеңілдік оларда қалады. Жолақының құны қаланың барлық бөлігінде, барлық маршруттарға бірдей. Адам 70 шақырым жүріп өтсе де, осы 120 теңгені төлейтін болады. Айлық жол жүру ақысы 7200 теңгеден 9900 теңгеге көтерілді, — деді ол.
Мәслихат депутаты қолма-қол төлем жасау мүмкіндігі неге алынып тасталғанын да түсіндірді. Оның айтуынша, төлемнің қолма-қол ақшасыз жасалуы — жүргізушілердің жұмысын жеңілдетеді, оларды алаңдататын себептерді азайтады. Оған қоса, төлеу жүйесінің ашықтығын қамтамасыз етіп, болашақта субсидия көлемін азайтуға мүмкіндік береді.
Сонымен қатар Нұрсұлтан Шоқанов «жолақы алдағы жылдары тағы да қымбаттауы мүмкін бе» деген сұраққа нақты жауап бермесе де, тарифтердің көтерілуін қолдайтынын айтты.
— Менің пікірімше, тарифтерді көтеру қажет. Бүгін өзге де депутаттар осыған ұқсас ойларын ортаға салды. Өйткені көмекті шынымен қажет ететін адамдардың тобына ғана субсидия жасалуы керек. Олар: зейнеткерлер, студенттер, көпбалалы аналар, — деді депутат.
