Алматыда 59 хостел жатақхананың жетіспеушілігінен баспанасыз қалған студенттерді қабылдайды, деп хабарлайды kaskelen.kz.
Алматының студенттік жатақханаларында орын тапшылығы жеке қонақ үйлер есебінен шешілетіні туралы 12 тамызда ғылым және жоғары білім министрі Саясат Нұрбек өзінің Telegram-каналында хабарлады.
“Алматыда ЖОО студенттері үшін жатақханалардың жетіспеушілігін жеке жатақханалар есебінен шешетін боламыз. Алматы қаласының университеттері 60-қа жуық шағын қонақ үй иелерімен келісімшарт жасасты. Кәсіпкерлер бұл ұсынысты қуана қабылдады”, – деп жазды министр.
Министр келтірген Atameken Business ақпараты бойынша, әр студентті орналастыру үшін жатақхана иелері айына 30-дан 50 мың теңгеге дейін алады. Жалпы еліміз бойынша студенттерді қонақ үйлерге орналастыру есебінен жатақханаларда 20 мың орынның жетіспеушілігін өтеу жоспарлануда.
Қазақстанда студенттік жатақханаларда орындарды бөлудің жаңа ережелері 2022 жылдың соңында бекітілді. Маусым айында бейінді министрлік жатақханалардағы орындарға мониторинг жүргізуге ниетті екені белгілі болды.
