Жер сілкінісі туралы жалған ақпарат таратқан әйел табылды. Ол мессенджерлер арқылы жойқын зілзала болады деп, сағатына дейін айтып, елді үрейлендірген, деп хабарлайды kaskelen.kz порталы “КТК” телеарнасына сілтеме жасап.
“Қатты жер сілкінісі қайта болады, қаладан шығып, қашыңыздар” деп әлеуметтік желіде үндеу тастаған. Бұндай хабарламалар үрей, дүрбелең туғызды. Сондықтан барлық азаматтарға айтатыным, жалған ақпарат таратпаңыздар, таратуға себепкер болмаңыздар.
Содан соң әр ақпаратты жіті зерделеп, тек ресми дерек көздерден алынған ақпаратқа қана сенулеріңізді сұраймын”, – дейді Алматы қаласы полиция департаментінің ресми өкілі Салтанат Әзірбек.
Бірнеше адам анықталып, қазір оларды жауапқа тарту бойынша жұмыс жалғасып жатыр.
Ал 1995 жылы туған Ж. есімді азаматтың кінәсі дәлелденсе, ірі мөлшерде айыппұл төлейді немесе Қылмыстық кодексте қарастырылғандай үш жылға дейін мерзімге бас бостандығынан айырылуы мүмкін.
Шындыққа жанаспайтын өзге де аудиожазбалардың авторларын анықтауға бағытталған іс-шаралар әлі жүргізіліп жатыр.
