Соңғы айлары Алматы тұрғындары жер сілкінісі үрейімен ұйықтайтын болды. Әсіресе көпқабатты үй тұрғындары сәл дүмпу сезе салсымен далаға атылып шығатын болған. Бірқатар ғимараттар тұрғын үйлерге зақым келген. Осының салдарынан үйлері қираған қала тұрғындарына өнеркәсіп және құрылыс министрлігінің өкілдері мемлекеттен өтемақы берілетіні жайлы айтты, деп хабарлайды kaskelen.kz тілшісі 31 арнаның Информбюро ақпараттық бағдарламасына сілтеме жасап.
Қала тұрғындары баспаналарының зақымданғанын дәлелдеп, әкімдікке өтініш беруі керек. Содан соң арнайы құрылған комиссия мүшелері ғимараттарды жан-жақты сараптамадан өткізеді. Демек, олар тірек құрылымдарының бұзылуы немесе төбе, сылақ, қасбетті әрлеу сияқты жұмыстарға назар аударып, зерттейді.
Қалпына келтіру жұмысын қаржыландыруға келер болсақ, әлеуметтік нысандар бүлінген жағдайда жөндеу жұмыстары бюджет қаражаты есебінен жүргізілмек. Тұрғын үйлерге қауіп төндіретін зақым болса, онда мемлекеттік органдардың бюджетінен қаржы бөлінеді. Әзірше тізім жинақталып жатыр. Соңғы деректерге сәйкес, Алматыда жер асты дүмпуінен кейін 188 тұрғыннан өтініш түскен.
“Табиғи және техногендік сипаттағы төтенше жағдайлардың салдарынан қираған тұрғын үй құрылысына Қазақстан Республикасы Үкіметінің және жергілікті атқарушы органдардың резервтерінен қаражат бөлінген жағдайда облыстың жергілікті атқарушы органдары растаушы құжаттардың негізінде тұрғын үйі авариялық деп танылған зардап шеккен азаматтардың тізімін ұсынады. Ғимараттар мен құрылыстардың тиімділігін және орнықтылығын техникалық зерттеп-қараудан кейін ғана анықталады”, – деді ҚР өнеркәсіп және құрылыс министрлігі тұрғын үй құрылысы басқармасының басшысы Амантай Телқожа.
