Қостанайда соңғы күндері үш жол көлік апаты тіркелді деп хабарлайды Kaskelen.kz
Жол апатының салдарынан ауыр жарақаттанған адамдар бар.
9 тамыз күні тал түсте Қостанай қаласының Паволов пен Қайырбеков көшелерінің қиылысындағы жаяу жүргінші жолында көлік апаты орын алды.
«Hyundai көлігі мен екі жаяу жүргіншінің қатысуымен жол апаты болды. Жаяу жүргіншілердің бірі 2013 жылы туған кәмелетке толмаған бала. Екі зардап шегуші Қостанай қалалық ауруханасының жансақтау бөліміне жеткізілді. ҚР Қылмыстық кодексінің 345-бабының 2-бөлігі бойынша қылмыстық іс қозғалды», – деді Қостанай қалалық ӨМПС қоғамдық тәртіпті және жол қозғалысын қорғауды қамтамасыз ету жөніндегі аға инспекторы Әсемгүл Ерденова.
Полицияның мәліметінше, жол апаты жаяу жүргіншілер өткелінде болған. Жол қиылысында бағдаршам орнатылған, бірақ сол сәтте жөндеу жұмыстарына байланысты олар жұмыс жасамаған.
Жүргізуші жаяу жүргіншілерге басымдық бермеген, соның салдарынан соқтығыс болған деген болжам бар.
Облыстық денсаулық сақтау басқармасы қызметкерлерінің айтуынша, зардап шеккен ер адам жансақтау бөлімінде жатыр, жағдайы ауыр. Зардап шегуші көптеген жарақаттар алған, оның ішінде бас сүйек-ми жарақаты да бар.
10 жасар бала, өзі жатқан облыстық балалар ауруханасы дәрігерлерінің айтуынша, бас миының контузиясы бар, бірақ динамикасы оң.
