Жыл басынан бері есірткі қылмысын жасаған 30 жасөспірім ұсталды. Бұл туралы ІІМ Есірткі қылмысына қарсы іс-қимыл департаменті бастығының орынбасары Бақытжан Әмірханов айтты, деп хабарлайды kaskelen.kz тілшісі.
«2024 жылдың өткен кезеңінде есірткі қылмысын жасауға қатысқаны үшін 30 кәмелетке толмаған ұсталды. Тек өткен аптада екі кәмелетке толмаған қолға түсті. Шымкентте мамыр айында орта мектепті бітірген жасөспірім ұсталды. Одан 13 пакет мефедрон тәркіленді. Күні кеше ғана Көкшетауда 14 жастағы жасөспірім ұсталып, одан салмағы 200 грамнан астам 55 пакет мефедрон тәркіленді. Жауап алу барысында жасөспірім осындай тәсілмен мопед сатып алуға ақша тапқысы келгенін айтқан», – деді ол ведомствода өткен брифингте.
Осыған байланысты Ішкі істер министрлігі ата-аналарды балаларының уақыт өткізуіне бақылауды күшейтуді сұрап отыр.
«Балалардың қоршаған ортасын зерттеп, олардың жазғы демалыс кезінде бос уақытын ұйымдастыру керек. Жасөспірімнің жеке заттарындағы изолента, кішкентай пакеттер, қалталық электрондық таразы, дәрі салынған блистерлер немесе көз тамшыларымен шөлмектер қауіп-қатер белгісі саналады. Телефонында кіре берістердің, аялдамалардың, үй қабырғаларының суреттері болса және ең бастысы – ата-анасы сатып алмаған және олардың қайдан келгенін жасөспірім түсіндіргісі келмейтін жаңа қымбат заттар күдік туғызуы керек», – деді ІІМ өкілі.
Оның сөзінше, осы белгілердің барлығы кәмелетке толмағанның есірткінің заңсыз айналымына қатысу қауіп-қатерін анық көрсетеді.
«Мұндай белгілер болмаса да баланы есірткі өткізуге тартуы мүмкін екендігі туралы онымен міндетті түрде сөйлесуге кеңес береміз», – деді ол.
