Бірнеше пәтерінің жиынтық құны 450 млн теңгеден асатын адамдарға мүлік салығы 1,5 пайыз болуы мүмкін. Бұл туралы Ұлттық экономика вице-министрі Азамат Әмрин айтты, деп хабарлайды kaskelen.kz порталы.
– Осы орайда ең бастысы мүлікке арналған салық мөлшерлемесінің артуы жайында айтқан жөн шығар. Енді мүлік жиынтығының бәріне бірдей қолданылатын мөлшерлемені есепке аламыз. Өйткені біз статистиканы қарадық. Бізде меншігінде 65 пәтер бар адам тіркелген. Айталық, бір бөлмелі пәтер 25 млн теңге тұрса, онда қазір оған мүлік салығы құнының шамамен 0,5-0,6 коэффициентін құрайды. Егер, 60 пәтердің әрқайсысын осы құн бойынша алсақ, онда сомасы 0,6 пайыздық мөлшерлемемен болады, – деді вице-министр Сенатта өтіп жатқан салық саясатының және салықтық әкімшілендіруді жетілдірудің өзекті мәселелеріне арналған дөңгелек үстел отырысында.
Оның айтуынша, аталған пәтерлердің жиынтық құны 450 млн теңгеден асып кетеді. Соған орай салынатын салық мөлшерлемесі 0,6 емес 1,5 пайыз болуы тиіс.
– Сондықтан жиынтығын есептеген кезде барлық мүліктің мөлшерлемесі ендігі уақытта 1,5 пайыз болып, артады. Бұл мүліктерді сатып алуға мүмкіндігі бар адамға жоғары салық салынуы тиіс, – деді Азамат Әмрин.
