Заңгер Жанна Уразбахова Салтанат Нүкенованың өліміне қатысты тергеудің барысы туралы айтты, деп хабарлайды kaskelen.kz тілшісі.
Әлеуметтік желідегі парақшасында Жанна Уразбахова әріптесі Игорь Вранчевпен бірге Салтанат Нүкенованың отбасысының мүддесін қорғайтынын айтты.
Заңгердің сөзінше, бірнеше сот-медициналық сараптамалар жүргізілген. Ішкі істер министрлігі таратқан ақпаратқа сүйенсек, 10-нан астам сараптама жүргізілді. Бірнеше сараптама әлі де жалғасып жатыр. Қылмыстық іс “аса қатыгездікпен жасалған кісі өлтіру” бойынша тергелуде.
“Жоғарыда аталған қылмыс 15 жылдан 20 жылға дейінгі мерзімге бас бостандығынан айыру немесе мүлкі тәркіленіп немесе онсыз өмір бойына бас бостандығынан айыру түрінде жазаланады. Тергеу аяқтала салысымен тергеуші дәлелдемелер, айғақтар іс бойынша жиналған барлық сараптамалардың негізінде күдіктіге қатысты түпкілікті сараптама жасайды. Одан кейін тергеуші сотқа дейінгі тергеп-тексерудің аяқталғаны туралы хабарлама береді және тараптарға қылмыстық іс материалдарымен танысу үшін уақыт береді. Танысу кезінде қорғаушылар өз өтініштерін дайындайды. Олар қаралған соң істі қосымша тергеу әрекеттерін жүргізу үшін қайта басталады немесе іс прокуратураға жіберілу туралы шешім қабылданады”, – деді заңгер.
Сонымен қатар. заңгер аса ауыр қылмыстар бойынша сотталушы сотты алқабилердің қатысуымен өткізуді талап етуге құқылы екенін атап өтті.
