Көмірсутектерді өндіру компаниясы – Phystech II АҚ Қазақстанға акциялардың 100 пайызын сыйға тартты, деп хабарлайды kaskelen.kz тілшісі KASE-ке сілтеме жасап.
Компанияның акционерлер қоғамы жай акцияларының 100 пайызын мемлекетке беру туралы шешім қабылдады.
Акциялары KASE Қазақстан қор биржасының ресми тізімінде тұрған Компания акционерлердің кезектен тыс жалпы жиналысының 4 қазандағы шешімдері туралы хабарлады.
Дауыс беретін акциялардың 99,28 пайызы қазіргі уақытта “КазСтройПроект-А” ЖШС, тағы 0,72 пайызы – Қайрат Боранбаевқа тиесілі.
“Акционерлер ерікті түрде және өтеусіз мемлекет пайдасына – мемлекеттік органдардың балансына – қоғамның 13 749 100 жай акциясын беру туралы шешім қабылдады. Бұл жалпы бағалау құны 35 миллиард 417 миллион 122 мың теңгені құрайтын қоғамның жай дауыс беретін акцияларының 100 пайызын құрайды”, – делінген хабарламада.
Phystech II АҚ Маңғыстау облысындағы Солтүстік Қаражанбас мұнай кен орнында мұнай мен газды барлауды және өндіруді жүзеге асыратын жер қойнауын пайдаланушы болып табылады.
