Ауа райының қолайсыздығы туралы ескертуге қарамастан, жолға шығып, боранға кептеліп қалғандар үшін қандай шаралар қабылданады? Бұл туралы ҚР ІІМ әкімшілік полиция комитетінің ресми өкілі Ақтоты Боранова айтып берді.
Маманның айтуынша, ауа райы жағдайы туралы шешімді жол иесі төтенше жағдайлар және ішкі істер министрліктерімен бірлесіп қабылдайды.
– Яғни республикалық және халықаралық маңызы бар жолдардың иесі – «Қазавтожол» компаниясы. Оның қарамағында 107 республикалық маңызы бар жол бар, 17 ақылы учаске бар. Ескерту хабарламасы келді ме, келмеді ме, адам естіді ме маңызды емес, мемлекеттік органның басты мақсаты – қауіпсіздікті қамтамасыз ету, келеңсіз жағдайда қалып қойған азаматтарға көмектесу, – деп түсіндірді А.Боранова.
Бұл ретте, ҚР әкімшілік құқық бұзушылық туралы кодексінің 667-бабы бойынша қудалау (құқықтық тәртіпке бағынбау немесе құқық қорғау немесе арнаулы мемлекеттік орган қызметкерінің талабына бағынбау, құқықтық қызметке кедергі жасау) жолды бөгеу кезінде құзыретті органдармен төбелесіп қалған жағдайда ғана қолданылады.
– Негізі жолды жабу туралы шешім Көлік министрлігінің 492-бұйрығымен қабылданады. Содан кейін осы талаптарды бұзғаны үшін деп 667-баппен іс қозғалады. Бұл бапты қарау соттың құызретінде болады, яғни айыпты 15 тәулікке қамауға алынады, немесе 30 АЕК айыппұл төлейді. Дегенмен бұл жерде басты мақсат – профилактикалық жұмыстар. Биыл әзірге ешкім жауапқа тартылған жоқ, – деді спикер.
Жол боран соғып тұрған жерде емес, айналма жол бар жерден шағын 10-20 шақырым қашықтықта жабылады.
– Кей жүргізушілер «алдымыз ашық, боран жоқ, жолды неге жаптыңдар?» деп ренжиді. Жиырма шақырымнан кейін жолда не боп жатқанын білмейді. Ол жерде айналма жол болмағандықтан, оларды құтқару мүмкіндігі де шектеулі болады, – дейді Айнұр Боранова.
