Қазақстанда қосылған құн салығын цифрлық теңгемен төлеуге болады, деп хабарлайды kaskelen.kz тілшісі.
Аталған пилоттық жобаны Мемлекеттік кірістер комитеті Ұлттық банкпен бірлесіп қолға алды.
— Цифрлық теңге — ұлттық валютаның жаңа сандық түрі, ол блокчейн технологиясы арқылы іске асырылады және ақшаны арнайы мақсатта пайдалануға мүмкіндік береді. Пилоттық жобаға қатысу үшін экспорттаушы-компания банктің қатысуымен Ұлттық банктен қосылған құн салығы таңбаланған цифрлық теңгені сатып алады, — деп хабарлайды кірістер комитетінен.
Айта кетейік, қосылған құн салығы таңбаланған цифрлық теңгемен тек бюджет және жеткізушілермен есеп айырысуға болады. Өзге мақсатта қолдануға немесе қолма-қол ақшаға айналдыруға рұқсат жоқ.
Сізге ұнауы мүмкін
— Цифрлық теңге арқылы жүргізілген барлық транзакция, сондай-ақ жеткізушілер бойынша қосылған құн салығы қозғалысы мен бюджетке түскен қаражат туралы ақпарат Ұлттық банк арқылы мемлекеттік кірістер органдарына жеткізіледі. Бұл мемлекеттік кірістер органдарына қысқа уақытта қосылған құн салығын қайтару үшін, сонымен қатар салықтық тәуекелді болдырмауға мүмкіндік береді, — делінген хабарламада.
Цифрлық теңгені бизнесте пайдаланудың негізгі артықшылықтары:
- ҚҚС қайтару мерзімі 55-75 күннен 15 жұмыс күнге дейін қысқарады;
- салықтық тексеруді, әкімшілік және қаржылық жүктемені азайтады;
- жедел және кепілді қаржы айналымы, бизнестің қаржылық жоспарларын жақсартады.
2024 жылы төртінші тоқсанда пилоттық жобаға қатысушыларға ҚҚС (қосылған құн салығы) 5 күннің ішінде қайтарылды.
Еске сала кетейік, былтыр қосылған құн салығын цифрлық теңгемен төлеуге болатыны туралы хабарлаған едік.
