Алматы қалалық денсаулық сақтау орталығы Райымбек даңғылында, №7 қалалық аурухананың маңында болған жол апатынан зардап шеккендер мен жүргізушінің жағдайын айтты, деп хабарлайды kaskelen.kz тілшісі.
Зардап шеккен 50 жастағы әйелдің денесінде көптеген сынықтары бар екені анықталды. Ол қазір жансақтау бөліміне жатқызылған. Жағдайы ауыр деп бағаланып отыр.
55 жастағы ер адам бас-ми жарақаты диагнозымен – нейрохирургия бөліміне жатқызылған. Автобус жүргізушісі 36 жастағы әйел де жабық бас-ми жарақатымен және миының жеңіл контузиясымен нейрохирургия бөліміне жатқызылған.
Оқыс оқиғадан зардап шеккен баланы №2 қалалық балалар клиникалық ауруханасының хирург, травматолог, нейрохирургтен тұратын көп салалы бригадасы тексеріп, нәтижесінде “сол жақ тізе буынының жұмсақ тіндерінің контузиясы” диагнозы қойылған. Оған гипс кигізіліп, амбулаторлық емдеуге жіберілген.
Денсаулық сақтау басқармасы науқастарға барлық қажетті медициналық көмек толық көлемде көрсетіліп жатқанын айтты.
