Қазақстанда 19 шетелдік жоғары оқу орындарымен білім беру бағдарламалары жүзеге асырылып жатыр, деп хабарлайды kaskelen.kz порталы.
Орталық коммуникациялар алаңында өткен брифингте ҒЖБМ Жоғары және жоғары оқу орнынан кейінгі білім комитетінің төрағасы Гүлзат Көбенова елімізде 19 шетелдік жоғары оқу орындарымен білім беру бағдарламалары жүзеге асырылып жатқанын айтты. Ал, 8 шетелдік жоғары оқу орындарымен серіктестік орнату мәселесі пысықталып жатқан көрінеді. Бұл филиалдар жастарға, оның ішінде ауыл жастарына, халықаралық стандарттарға сай жоғары білім алуға мүмкіндік бермек.
Оның сөзінше, Ақтөбеде Хериот Уатт университетінің филиалында Қазақстанның 9 өңірінен жастар білім алып жатыр. Биыл мұнда РФ Тула облысынан алғашқы студент оқуға түскен.
«Солтүстік Қазақстанда Аризона университетінің филиалында Қазақстанның 18 өңірінен жастар білім алуда. Сондай-ақ, Атырау облысында Губкин атындағы университеті, Алматы қаласында МИФИ университінің филиалдары табысты жұмыс істеп жатыр. Бұл филиалдар биыл 3-рет қабылдауды жүзеге асырып келеді. 2023 жылдан бастап Ақтауда Есенов университетінде неміс университеттерінің консорциумы арқылы Тұрақты инжиниринг институты құрылды. Сонымен қатар, Шығыс Қазақстанда Быдгощ қаласының Экономика университетінің филиалы және Қызылордада Сеултех университетімен бірлесіп, Жасанды ителллект жоғары мектебі ашылды», – деді Гүлзат Көбенова.
Айта кетейік, биылдан бастап Сәтбаев университетінде әлемнің жүздігіне кіретін Гонконг СіtyU университетінің қос диплом бағдарламасы жүзеге аса бастады. Жақында ғана Қытай және Қазақстанның президенттері ашқан Бейжің тіл және мәдениет университеті де жұмысын жалғастыруда.
Абай университетінің базасында Лотарингия университетінің, Дулати университетінің базасында Д.И.Менделеев атындағы Ресей химия-технологиялық университетінің, Қазақ ұлттық аграрлық зерттеу университетінің базасында Ташкент ауыл шаруашылығын ирригациялау және механикаландыру инженерлері институтының филиалдары жұмыстарын бастағанын атап өткен жөн.
