2 жастан 6 жасқа дейінгі балаларды мектепке дейінгі тәрбиемен қамту 92,5%-ға жетті, деп хабарлайды kaskelen.kz тілшісі Білім және ғылым министрлігінің баспасөз қызметіне сілтеме жасап.
Ағымдағы жылдың басынан бері еліміздің өңірлерінде 64 мың орынға арналған 561 мектепке дейінгі ұйым ашылды. Бұл кезекте тұрған 2 жастан 6 жасқа дейінгі балалардың 92,5%-ын мектепке дейінгі тәрбиемен қамтуға мүмкіндік берді.
Жаңа орындардың ашылуы мектепке дейінгі ұйымдардың шағын орталықтары желісін салу, қайта құру және кеңейту, сондай-ақ жекеменшік мектепке дейінгі ұйымдарда мемлекеттік білім беру тапсырысын орналастыру арқылы жүзеге асырылады.
— Мемлекет басшысының тапсырмасы бойынша барлық балалар үшін тең бастапқы мүмкіндіктерді қамтамасыз етуге бағытталған бірқатар шаралар қабылдануда. Балаларды мектепке дейінгі тәрбиемен және оқытумен қамтуды ұлғайту үшін 2023-2027 жылдарға арналған мектепке дейінгі ұйымдарды іске қосудың қадамдық жоспары әзірленді. Бүгінгі таңда балаларды мектепке дейінгі оқытумен және тәрбиемен қамтуда 13 өңір жоғары көрсеткішке қол жеткізді. Оның ішінде Шымкент қаласын, Павлодар, Солтүстік Қазақстан, Жамбыл, Түркістан, Ақтөбе облыстарын атап өтуге болады, — деп қорытындылады Мектепке дейінгі білім беру департаментінің директоры Манара Адамова.
Бүгінгі таңда елімізде 11,6 мыңға жуық мектепке дейінгі ұйым жұмыс істейді, онда 1 миллионға жуық бала тәрбиеленуде.
