“9-20-25” жаңа ипотекалық бағдарламасы 2024 жылдың наурыз айында басталған еді. Екі аптаға жуық уақытта қазақстандықтар 16 мыңнан астам өтініш беріп үлгерді. Бірақ оның 9 мыңнан астамы қабылданбады.
Өтініштер 30 сәуірге дейін қабылданады. Ал нәтижелерді есептеу және үміткерлерді бағалау мамыр айының ортасына дейін жүргізіледі.
Бұл жеңілдетілген ипотекалық бағдарлама үйді тиімдірек шарттармен сатып алуға көмектеседі, алайда оны қазақстандықтардың барлығы бірдей пайдалана алмайды.
Бағдарлама талаптары
- Жаңа ипотекамен тұрғын үй алу үшін қатысушылар бірнеше талапқа сай болуы керек:
- соңғы алты айда ресми табысы болуы қажет;
- “Отбасы банкінде” депозиттің болуы, бұл жағдайда туыстар берген салымды пайдалануға рұқсат етіледі;
- жинақталған сома 1 миллион теңгеден асуы керек, ал жинақтау мерзімі кемінде 18 ай болуға тиіс;
- қатысушыда немесе отбасы мүшелерінде соңғы бес жыл ішінде жылжымайтын мүліктің кез келген түрінің болмауы.
Несие шарттарына келер болсақ, несие берілетін ең ұзақ мерзім 19 жылға дейін жетуі мүмкін, ал максималды қолжетімді сома аймаққа қарай 18 миллионнан 30 миллион теңгеге дейінгі аралықта өзгеріп отырады.
Алғашқы жарна 20 пайыздан басталады, ал мөлшерлеме бастапқыда 9 пайызға тең болады (жылдық тиімді мөлшерлеме 9,2 пайыздан басталады), алайда несие сомасының 50 пайызын жинақтағаннан кейін оның жылдық мөлшерлемесі 3,5 пайыздан 5 пайыз аралығында болады (жылдық пайыздық мөлшерлеме жылына 3,6 пайыздан бастап).
Қандай баспана сатып алуға болады?
Ипотекалық бағдарлама аясында қазақстандықтардың:
- бастапқы тұрғын үй – яғни пайдалануға берілген көп пәтерлі тұрғын үйдегі пәтерді;
- салынып жатқан тұрғын үйді – тұрғын үй құрылысының бірыңғай операторының кепілдігімен үлестік қатысу шартымен пәтер сатып алуына болады;
- қайталама тұрғын үйді – моноқалаларда, ірі ауылдық елді мекендерде, облыс орталықтарында, бірақ Астана, Алматы қалалары және облыс орталықтары бұл қатарға кірмейді (оларда тек жаңа тұрғын үйлер алуға болады).
Айта кетейік, Алматы немесе Астана қалаларында тұрғын үй сатып алу үшін тұрақты тіркеу болуы қажет.
Осылайша, қазақстандықтардың “9-20-25” ипотекасымен тіпті үлестік құрылыс аясында да жаңа тұрғын үй иесі атануға мүмкіндіктері бар. Бұл соңғы шығындар мен несие сомасын азайтуға көмектеседі.
Бұған дейін Қазақстанда 9 пайызбен жаңа ипотека үшін қанша төлеу керек екенін айтқан болатынбыз.
