Елімізде жүргізуші куәліктерін, техникалық төлқұжаттарды, автокөліктерге мемлекеттік нөмірлерді беруге, сонымен қатар оларды жеделдетіп шығаруға жаңа бағалар белгіленді, деп хабарлайды kaskelen.kz.
Telegram-дағы “Юрист Параграф” арнасының мәліметіне сәйкес, Ішкі істер министрлігі жүргізуші куәліктерін, көлік құралдарын мемлекеттік тіркеу туралы куәліктерді (техникалық төлқұжаттарды), сондай-ақ автомобильдерге мемлекеттік нөмірлік белгілерді дайындау бойынша көрсетілетін қызметтердің бағаларын бекіту туралы бұйрық шығарды.
Құжаттарды дайындау құны (ҚҚС-сыз) енді келесідей жүзеге асады:
- жүргізуші куәлігі – 4 367 теңге;
- көлік құралдарын мемлекеттік тіркеу туралы куәлік – 2 250 теңге;
- мемлекеттік тіркеу нөмірлері – 3 923 теңге;
- “ТРАНЗИТ” мемлекеттік тіркеу нөмірлері – 126 теңге.
Бұл ретте мемлекеттік тіркеу нөмірлерінің телнұсқалары мен сұранысы жоғары нөмірлердің жеделдетілген өндірісінің бағаларын бекіту туралы тағы бір бұйрық шығарылды.
Telegram-дағы “Юрист Параграф” арнасының мәліметінше, көлік нөмірлері Астана, Алматы, Шымкент, Қарағанды, Қостанай, Павлодар, Петропавл, Семей, Тараз, Қызылорда, Түркістан, Талдықорған, Ақтөбе, Атырау, Ақтау, Орал және Өскеменде 1 жұмыс күнінде шығару құны (бірінші жеделдік санаты) енді 13 773,9 теңге болады.
Жезқазған, Қонаев, Көкшетау, сондай-ақ аудандар мен облыстық маңызы бар қалалар үшін жеделділіктің екінші санаты (5 жұмыс күні) қолданылады.
