Су ресурстары және ирригация министрлігі елдегі ең ұзын 5 каналға шолу жасады, деп хабарлайды kaskelen.kz порталы.
Жаңадария каналы
Жаңадария каналы – Сырдария өзенінің сол жағалауында орналасқан.
Сізге ұнауы мүмкін
Ол егістік жерлерді, көкөніс және бау-бақша дақылдарын, сондай-ақ қызылорда облысының табиғи жайылымдары мен жемшөп алқаптарын суаруға арналған.
Каналдың жалпы ұзындығы 555,4 шақырымды құрайды, оның 535,6 шақырымы табиғи су арнасы арқылы өтеді.
Ертіс-Қарағанды каналы
Ертіс-Қарағанды – Орталық Қазақстанның өнеркәсіптік аудандары мен ауыл шаруашылығын сумен қамтамасыз етуге арналған канал.
Ұзындығы – 458 шақырым. Оның 272 шақырымы Павлодар облысы арқылы, 186 шақырымы Қарағанды облысы аумағы арқылы өтеді.
Ертіс өзенінің саласы – Ақсу қаласының үстінде орналасқан Белая өзенінен бастау алады.
Каналдың негізгі құрылыстары: 22 сорғы станциясы, олардың көмегімен су 418 метрге көтеріледі, 14 су қоймасы және 34 канал.
Бір сорғы станциясы секундына 18 текше метр немесе тәулігіне 1,5 миллион текше метр су өткізе алады.
Арыс-Түркістан каналы
Арыс-Түркістан – Түркістан облысы аумағындағы ирригациялық канал. Жалпы ұзындығы шамамен 196 шақырымды құрайды.
Арыс каналының қараспан су қоймасынан Бөген су қоймасына дейінгі ұзындығы 51 шақырымды құрайды.
Бөген су қоймасынан басталатын Түркістан каналының ұзындығы шамамен 145 шақырымды құрайды.
Үлкен Алматы каналы
Д.Қонаев атындағы Үлкен Алматы каналы Іле өзенінің бассейнінде орналасқан. Канал суы егістіктерді суаруға, ауқымды өндірістік, шағын экономикалық және рекреациялық қажеттіліктерге пайдаланылады.
Гидротехникалық құрылысты салу идеясы Дінмұхамед Қонаевқа тиесілі.
Қазақстан компартиясы орталық комитетінің бірінші хатшысы жобаға рекордтық 270 миллион рубль бөлу туралы шешім қабылдайды.
Жалпы ұзындығы – 168 шақырым. Канал Алматы облысының Еңбекшіқазақ, Талғар, Қарасай аудандары арқылы Өтіп, Алматы қаласына дейін жетеді.
Қызылқұм каналы
Қызылқұм каналы – Түркістан облысындағы ирригациялық канал. Жалпы ұзындығы 116,3 шақырымды құрайды.
Сырдария өзеніндегі Шардара су қоймасынан бастау алады және облыстың солтүстік аймағын сумен қамтамасыз етеді.
Канал 74,3 мың гектардан астам егістік жерлерді суаруға, сондай-ақ Шардара су қоймасының толып кету қаупі төнген кезде тасқын суларды өткізуге пайдаланылады.
